Diktardagen 2025

Mona Høvring får Diktartavla 2025

Prisutdelinga finn stad på Hardanger folkemuseum måndag 18. august kl. 18.00.  

Vinnar av Diktartavla 2025 er poet Mona Høvring. Prisutdelinga finn stad på diktarstien på Utne måndag 18. august kl 18.00. Det er Haugesenteret i Ulvik og Hardanger folkemuseum på Utne som deler ut prisen. Lyrikar Per Olav Kaldestad fekk Diktartavla 2024. Kaldestad var diverre hindra i å ta imot prisen i fjor, så denne dagen feirar me to prisvinnarar. Dette blir rett og slett ein poetisk festkveld, og det på Olav H. Hauge sin fødedag. Etter nedlegging av diktartavlene i tunet  vert det program inne i museet. Mona Høvring og Per Olav Kaldestad vil lesa for oss og samtala med konservator i Haugesenteret Stein A. Hevrøy.

Velkomen til feiring!

Mona Høvring (f. 1962) har ein variert forfattarskap innan poesi og prosa og gjev ut bøker på både nynorsk og bokmål. Høvring debuterte i 1998 med IIK! Ein dialog og har sidan gitt ut fjorten bøker. Av desse er heile åtte diktsamlingar. Hennar nyaste lyrikkutgjeving kom i år og har tittelen Skogsinteriør med rev og andre dikt. Kompleks, sanseleg og utforskande er tre treffande ord om årets prisvinnar. Eit litterært univers heilt særeige i den norske poesifloraen kan vinnaren også seiast å ha. Den lyriske klangen er umiskjenneleg eigen, og den språklege rikdomen stor hjå poeten Høvring.

Sidan debutsamlinga Kikkert kom i 1973 har Per Olav Kaldestad (f. 1947) gjeve ut poesi, sakprosa, gjendiktingar, skodespel og ein stor del barne- og ungdomsbøker. Det har blitt over 40 bøker , og nær halvparten av dei er diktsamlingar. Den nyaste diktsamlinga hans, Sonettar, kom i 2023. Kaldestad har ein særskild poetisk styrke i dei  moderne dikta sine, med klassiske strofeformer og den tidlause sonettforma. I si nyaste diktsamling Sonettar tek han lesaren med på ei rik reise, der kjærleik til verda og menneska står heilt sentralt. Kaldestad er også ein dyktig gjendiktar av mellom anna poetar som D. H. Lawrence, Thomas A. Clark og William Shakespeare.

Diktardagen

Diktardagen er eit årleg arrangement der ein heidrar ein norsk forfattar ved å leggja ned ei diktartavle for vedkomande på Diktarstien ved Hardanger folkemuseum. Den første diktartavla kom i 1992, og dagen blei etablert offisielt på 85-årsdagen til Olav H. Hauge i 1993. Hauge var sjølv med og tok initiativet til Diktarstien.

Diktarstien

Diktarstien er ein vakker hellegang med 32 diktartavler som prydar det flotte museumstunet ved Hardanger folkemuseum på Utne. Høvring og Kaldestad går inn i rekkja av markante diktarar som til no har fått Diktartavla. Blant dei finn me Olav H. Hauge, Halldis Moren Vesaas, Jan Erik Vold, Kolbein Falkeid, Tone Hødnebø, Jon Fosse, Gro Dahle, Eldrid Lunden og Øyvind Rimbereid.

Billett 200,-  Kjøp billett på nynorsk.no